Ya en casa

Dimpués de un cabo de semana una mica ocupau, ya son atra vez en la rutina. Si podén decir rutina a’s zaguers diyas de curso. 🙂
Ayere va estar un diya largo, con la entrega de premios del Festival de Cine de Valencia, y aparte tener que tornar dende alí ta L’Aínsa. El primer premio de la categoría A, en la que participaban la escuela de Fiscal y la De San Chuan, va dir a parar al CEIP El Crist de Meliana (Valencia) con “Amor mortal”. L’acesit el va conseguir el CRA Sella-Orxeta-Relleu de Alicante con “Xssst”.

Es dos años anteriors no heben puisto acudir al festival, pero estiaño sí, y la esperiencia ha estau buenisma. Gran organización, que amés nos ha tratau como si fuesen en casa. Fa goi que troballos fetos en escuelas chicotas de Sobrarbe haigan estau al mesmo nivel que es de centros més grans y con més recursos. Y en el caso del curto de San Chuan, viyer que se proyeta chunto con atros en atras luengas como catalán, gallego, valenciano u euskera ye un argüello. Sobre tot pensando en que el nuestro “Cine en aragonés” se fa con una hora a la semana de clase…
En fin, que la custión ye que l’año que viene podián tornar. 🙂

Esperiencias escolars destacadas en l’Heraldo escolar

No sabez la ilusión que fa viyer que el troballo que se fa en las aulas tienga repercusión difuera. Un año més, el suplemento escolar de Heraldo de Aragón s’ha alcordau de nusatros en su especial de esperiencias escolars de cabo de curso. Astí podez viyer mencións a las atividaz fetas en es tres centros que he troballau es zaguers cursos en Sobrarbe: CEIP Asunción Pañart, CRA Alto Ara y CRA Cinca-Cinqueta. ¡Mersi!

 

Rematando el curso

En el cole de L’Aínsa cal acabar las clases d’aragonés en mayo per temas de trasporte con la chornada intensiva. Encá con ixas, estes diyas a ratos son rematando es curtos que hen aprestau en estes trimestres ta’l proyeto “Cine en aragonés”. Estiaño, amés, nos complicán més la vida con ténicas nuevas de grabación. Ta tener es problemas que tenén de saturación y de falta d’espacios en el centro, encara nos hen puisto apañar.
¡Tocará mallar este verano ta que en uns meses podián fer es estrenos!
01

Cursa a l’ecomuseo de L’Aínsa

Este maitín la mainada de 1º hen marchau de vesita a l’ecomuseo de L’Aínsa. Son estudiando es sers vivos, con lo que no podeben deixar pasar la oportunidá de dar una golteta per este espacio de la “Fundación para la Conservación del Quebrantahuesos“. Alí nos han esplicau abundáns cosas sobre las aves rapaces, y basta hen puisto oservar unas cuantas vivas. De camín ta’l museo tamién nos hen parau a mirar el paisache y nos hen puyau a la navata del castiello. En i hai belún que se le veye buena traza, asinas que en uns años igual el tenén baixando pe’l río… 🙂

Ta’l Festival Internacional de Cine de Valencia, per partida doble

Fa un momento nos ha allegau la noticia de que serén preséns de nuevo en el 31 Festival Internacional de Cine de Valencia, Cinema Jove. Esta vez, han trigau dos curtos ta participar en la la seción “Encuentro audiovisual de Jóvenes”: “Las pastilletas” de las clases d’aragonés en la escuela de San Chuan de Plan (CRA Cinca-Cinqueta), y “El futbolista“, de la escuela de Fiscal (CRA Alto Ara).
Ya ye el tercer año que conseguín estar en este Festival, ¡y con el mérito de representar a dos centros de vez! Tos recuerdo que fa dos años la escuela d’A Espuña va ganar el segundo premio d’este certamen con “A espluga asesina“. ¡Norabuena y suerte!