Entre el maitín y la tarde hen feto las atuacións d’aragonés en el Diya de las Luengas del CEIP Asunción Pañart de L’Aínsa.
Hen cerrau el festival del cole con “As princesas y as campesinas”, una historia que se van inventar las ninas de 5º y en la que s’han feto es vestius. La verdá ye que ha quedau bien maja. Con atrices tan buenas…
[youtube=https://www.youtube.com/watch?v=TtztoYqzYP4]
De tardes hen contau un cuento ta’s borches d’infantil, “A rabosa y a berigüeta”. Nos ha aduyau Olga y la suya clase de cuatro años, qu’han feto un ixambre d’abellas estupendo.
Tos deixán tamién l’álbum de fotos. ¡Norabuena pe’l troballo bien feto!
Fer chuntos: Abizanda
El diya 25 d’abril nos achuntán toz es centros públicos de primaria qu’ofertan aragonés en la atividá “Fer chuntos Abizanda”. Organizau per la “Dirección General de Política Lingüística del Gobierno de Aragón” ye una chornada ta convivir es borches que estudian esta luenga en el Pirineo y ta conoixer las diferéns variedaz que forman l’aragonés.
Amés, podrén viyer “Dragoncio”, una obra d’es tititireros de Binéfar y vesitar el suyo museo, asinas como puyar ta l’atalaya d’Abizanda. ¡Seguro que pasán un diya de pistón!
Semana cultural de las luengas
Esta semana el CEIP Asunción Pañart fa una serie d’atividaz en torno a las luengas que se estudian en el cole. Nusatros farén unas obretas de teatro con el grupo de 5º y 6º. Ya tos contarén que tal han saliu, pero de momento, ¡el vestuario promete!
El cuerpo humano
Cuasi se nos pasa, pero la semana pasada von salir en el suplemento escolar del Diario del Alto Aragón. Este curso tamién me toca dar las Ciencias Naturals de 1º de primaria, y un d’es proyetos yera el cuerpo humano. Como el curso pasau va funcionar tan bien en Fiscal, he tornau a fer el mural del cuerpo humano. Y se veye que les ha feto goi en el periodico ta sacarlo. 🙂
Sobrarbe que son dos días, un curto documental d’Espiello
Continamos con las atividaz d’Espiello. Ayere, gracias a’s responsables del festival, voi tener el placer de charrar con Violeta del Río, una de las responsables del proyeto ganador del Siñal Espiello Chicorrón. Con “Tierra animada“, a traviés de tallers d’animación troballan la alfabetización audiovisual en centros rurals d’Argentina. En la charradeta que von fer, von poder comprebar como puestos tan diferéns como Sobrarbe y estas escuelas, tienen més puntos en común d’es que te puez entrefilar: luengas minoritarias, escuelas unitarias, culturas propias,…
Atro punto de trobada de las nuestras clases con Espiello ha estau la inclusión de las mesmas en el curtometrache documental “Sobrarbe que son dos días”, coordinau per Juan Carlos Somolinos y con la colaboración de cuasi cincuenta vecins de la comarca. Si quies viyer lo que ye vivir en Sobrarbe, esta ye una buena oportunidá.
Un buen maitín de sabado
Como ya heben contau, el sabado yera el diya de las proyecións de la clica. Como siempre, un placer estar en Espiello, y més cuan acude el tuyo alunnau a acompañar la sesión de cine. ¡Mersi a toz es borches que van venir! 🙂
La seción Cachimalla se va completar con el proyeto “Tierra animada” qu’ha estau premiau estiaño con el Siñal Espiello Chicorrón, y con la pelicula “Song of the sea”.
Ta rematar la entrada, tos deixán con l’avance que se va viyer en el festival de lo que son fendo en l’Asunción Pañart. ¡A viyer cuan s’estrena!
Semana de cine
Ye a punto de comencipiar Espiello, y la clica será presén per partida doble en el “XIV Festival Internacional de Documental Etnográfico de Sobrarbe”.
El viernes a las 19:15 horas s’estrena “Sobrarbe que son dos días“, un curto documental que nos contará la vida de la comarca seguntes l’han grabau la chen d’aquí. Las clases d’aragonés asomarán una miqueta el morro per alí.
El sabado, dentro de la seción Cachimalla, a las 11:00 tendrén “Cine en aragonés”. I habrá curtos de las escuelas de San Chuan, Saravillo, Bielsa y A Espuña. Amés, tamién se verán es que von fer en castellán en la escuela de Fiscal el curso pasau, y en primicia, un trailer d’es que son aprestando este curso en la escuela de L’Aínsa. En total, troballos de tres escuelas de Sobrarbe en las que he teniu l’honor de troballar estes zaguers cursos. 🙂
Podez consultar toda la programación del Festival en la suya web y en el programa de la muestra. ¡I hai entretenimento ta ratos!
Luis
No febas so que ubrir la puerta de la escuela, y ya te trobabas una sonrisa de bienvenida. Ixo, y aquel sol que entraba per las ventanas, te feba sentir en casa. Una casa en la que viyebas el respeto, almiración y cariño que teneban es borches pe’l suyo profesor. Un compañer del que voi aprender a estar una miqueta més mayestro (anque me falte abundante encara…). M’habría feto goi tornar a troballar con tú ta continar aprendendo, pero no podrá estar. Nos quedarén con es recuerdos, y mirarén de que no s’olvide lo que nos vas enseñar a toz, chicoz y grans. ¡Basta siempre, mayestro!
La clica en Espiello 2016
Un año més, el proyeto “Cine en aragonés” será presén en Espiello, el “Festival Internacional de Documental Etnográfico del Sobrarbe”. El sabado 9 d’abril se proyetarán curtos de las escuelas de Bielsa, A Espuña, San Chuan y Saravillo en la seción infantil, “Cachimalla”.
Amés, tamién se podrán viyer es dos curtos que von fer en la escuela de Fiscal el curso pasau en 1º y 2º de Primaria, y si i hai una miqueta de suerte, incluso podría allegar bela sorpresa del CEIP Asunción Pañart en aragonés. 😉
Ta rematar esta entrada, tos meto el trailer de “Sobrarbe que son dos días”, un curto-documental que son aprestando en Espiello sobre la vida cutiana de la comarca, y en el que amanixen las clases d’aragonés del Asunción Pañart. S’estrenará el 8 d’abril en la inauguración del Festival. ¡Promete!
[youtube=https://www.youtube.com/watch?v=cxx8gFIUF3A]
Cine en aragonés, en la revista "Educación 3.0"
La revista “Educación 3.0” adedica un articulo chicot al proyeto de cine que voi desenrrollar estes zaguers años en el CRA Cinca-Cinqueta. Atra vez, l’aragonés se fa visible en medios nacionals gracias a’s curtos d’es borches d’estas escuelas. 🙂
