Un año més, el proyeto “Cine en aragonés” será presén en Espiello, el “Festival Internacional de Documental Etnográfico del Sobrarbe”. El sabado 9 d’abril se proyetarán curtos de las escuelas de Bielsa, A Espuña, San Chuan y Saravillo en la seción infantil, “Cachimalla”.
Amés, tamién se podrán viyer es dos curtos que von fer en la escuela de Fiscal el curso pasau en 1º y 2º de Primaria, y si i hai una miqueta de suerte, incluso podría allegar bela sorpresa del CEIP Asunción Pañart en aragonés. 😉
Ta rematar esta entrada, tos meto el trailer de “Sobrarbe que son dos días”, un curto-documental que son aprestando en Espiello sobre la vida cutiana de la comarca, y en el que amanixen las clases d’aragonés del Asunción Pañart. S’estrenará el 8 d’abril en la inauguración del Festival. ¡Promete!
[youtube=https://www.youtube.com/watch?v=cxx8gFIUF3A]
Cine en aragonés, en la revista "Educación 3.0"
La revista “Educación 3.0” adedica un articulo chicot al proyeto de cine que voi desenrrollar estes zaguers años en el CRA Cinca-Cinqueta. Atra vez, l’aragonés se fa visible en medios nacionals gracias a’s curtos d’es borches d’estas escuelas. 🙂
Diya internacional de la luenga materna
Este domingo 21 de febré se celebra el “Diya internacional de la luenga materna” baixo l’auspicio de la Unesco. “A clica de L’Aínsa” colabora con la atividá de “Laton Man, un cómic en aragonés” en las més de cien atividaz que s’han aprestau ta esta celebración.
Amés, el sabado 20 a las 18:30 seré en el Centro Cultural Matadero de Huesca fendo una charrá sobre la enseñanza de l’aragonés chunto con atras atividaz organizadas per l’ayuntamento de Huesca.
La clica, trigada ta'l Foro d'innovación educativa d'Aragón
Fa uns meses el Departamento de Educación del Gobierno d’Aragón va meter en marcha un proyeto d’innovación educativa. Se va presentar en Alpartir con la presencia de la consellera Mayte Pérez y el mediático César Bona. La iniciativa mira d’achuntar docéns que aplican metodolochías innovadoras en las suyas aulas ta dinamizar, promover y potenciar la suya ación educativa.
El proyeto de la clica tiene l’honor de estar un d’es proyetos de la provincia de Huesca trigau ta participar en este Foro. Agradeixén a’s suyos responsables qu’haigan contau con la enseñanza de l’aragonés como esperiencia educativa innovadora. ¡El lunes comencipián con la primera reunión!
O cuento de nunca acabar
Aquí son de nuevo con atro libret ta’s borches de 1º y 2º. Nos vale ta conoixer las partes del diya y tiene truco, perque seguntes como te’l miras, ¡nunca s’acaba!
¡Vacancias!
Ya son a punto de plegar ta prener vacancias de Navidá. Nos vendrán bien a toz ta descansar y recargar las pilas ta’l segundo trimestre.
El cambio d’año ha estau la desincusa perfeta ta conoixer es meses, fendo un calandario presonalizado. Es borches de 3º a 6º se’l han feto como han quisto, metendo fiestas d’es suyos lugars, cumpleaños d’amigos y familia… Astí tenez una muestra d’es més majos. ¡Nos viyen en 2016!
Las cinco sirenas
Y aquí va el vídeo que quedaba pendién de la escuela de Fiscal del curso pasau. Una historia en la que amanixen valors sobre el compañerismo y el medioambién.
El futbolista
El curso pasau no voi fer clases d’aragonés, pero a cambio voi tener la oportunidá de estar tutor de primaria en la escuela de Fiscal. Va estar un curso estupendo, con compañers, familias y alunnau del millor que te puez trobar per ixes mundos. Asinas va salir tot en el curso, de pistón.
Alí tamién von fer atividaz con el cine, como per ixemplo es vídeos que van quedar finalistas en es “Premios Nacionales de Cortometrajes de Educación Vial“. Aparte, nos quedaba pendién estrenar dos curtos més que von fer en plastica aprovechando que estudiaben es medios de comunicación. Aquí va el primer, que se diz “El futbolista”, y que aparte nos da bel consello a la hora de minchar. 😉
El cuento de la raboseta
L’aragonés nos ha arribau sobre tot per trasmisión oral, asinas que tiene una buena ripa de tradición oral ta fer cuentos a’s més chicoz. En casa mía a yo me feban el cuento de la raboseta, asinas que, ¿que millor que contarlo tamién en clase y que se’l sepan las nuevas cheneracions? Y si no se’l aprenden, ¡a lo menos que’l sientan una vez! A estes, ferles goi, les n’ha feto… 😀
Diorama d’animals
En 5º y 6º ta comencipiar las clases von fer un diorama con pixel art. Ta’l que no sepa de que va l’asunto, son debuixos fetos con píxels, como si estasen presonaches de un videochuego clasico. Asti podez viyer uns cuantos animals d’esta traza. ¡Han quedau bien majos!
