Torna un clásico de las clases d’aragonés del CRA. El primer trimestre d’infantil ha estau adedicau al maletín con un cuerpo humano dentro. Hen pintau a rienda todas las partes, hen recortau, hen escrito es nombres de mans, peus, pancha… ¡Qué tremendos!
Remata el trimestre y remata la unidá que hen estau fendo. Se diz “¿Quí ye quí?” y hen troballau espresión oral con un chuego de cartas protagonizau y diseñau per es borches. Tamién hen feto descricións simples y hen conoixiu vocabulario de las partes de la cara a traviés de fichas y atividaz en la losa dichital. No yera difícil, pero caleba troballar, ¡e ixo’l han feto prou bien!
Baixo las siglas de CATEDU s’amaga el Centro Aragonés de TEcnologías para la EDUcación. Como podez viyer, la web de la Clica ye portada estes diyas como “Buena práctica educativa“. Da gusto viyer que te reconoixcan es compañers de profesión la fayena feta, e ixo t’anima a continar ta mirar de ferlo encara millor. 🙂
Este curso i hai una novedá en las clases d’aragonés del CRA Cinca-Cinqueta. Serén emplegando una ferramienta online que se diz Classdojo. Con ella, las familias pueden estar al tanto de lo que son fendo en clase, y tamién conoixer como va dindo la atividá de l’alunnau. La aplicación puede emplegarse con ordenadors, móvils, tablets… con lo cual , se puede estar al diya de la nuestra fayena en cualquier puesto.
Amés ye mui motivador ta’s borches, perque son representaus per mostruos que pueden dir modificando al suyo gusto conforme pase el curso. De momento, hen aprovechau en cada escuela y tenén murals con estes mostruos que van charrando en aragonés.
Este viernes tenén encuentro de convivencia en Plan de todas las escuelas. Farén tallers y chuegos con la temática de Halloween, que ye bien motivadora ta las luengas en clase. De tardes, es borches més grans tendrán la oportunidá de vesitar la mansión de Josephine, una nina que va vivir fa més de 100 años en Plan, y que naide sabe que va estar d’ella. ¿La trobarán?
Con estas anvistas en las escuelas, ¿qui no va a querer dir a troballar? 🙂
Esta tarde m’ha dau per mirar a evolución de alunnau que heban teniu las clases d’aragonés en el CRA, y ha saliu esta gráfica:
Este curso son 49, un més que cuan voi empecipiar en 2010, pero tamién con menos alunnau en cheneral en to’l CRA. ¡Continarén troballando firme ta puyar!
Gracias a la Asociación Oscense de Realizadores, este viernes el proyeto “Cine en aragonés” será presén en una proyeción en el Palacio de Congresos de Balbastro. Será a las 20:00. ¡Tos asperán!
Dos cursos dimpués, torno a troballar en casa. Dos años que me han serviu ta conoixer atros centros de Sobrarbe, y mirar d’aprender a estar millor mayestro. Dos años ta cambiar la situación de l’aragonés en la escuela, ara con un currículo baixo el brazo y con las clases dentro d’horario escolar. Mesmo puesto que me va tocar deixar fa dos cursos, pero con nuevos retos. Per suerte, ¡las ganas no faltan! 🙂
