Este maitín hen estau compartindo esperiencias cinematograficas entre el CEIP Asunción Pañart y el CRA Alto Ara en Espiello. Gracias a la organización del Festival hen puisto presentar una triga de curtos fetos el curso pasau entre Yolanda, la mayestra d’aragonés del CRA y yo en L’Aínsa.
La proyeción ha formau parte de la seción Cachimalla chunto con la película “Anina” y la presentación del Siñal Espiello Chicorrón al Proyeto “La Linterna Mágica”.
Per cierto, ya que i son, este lunes a las 21:30 en el programa “Objetivo” d’Aragón televisión saldrén con un reportache sobre la enseñanza de l’aragonés protagonizau per es borches de la escuela de Plan. ¡A viyer si salen bien guapos!
¡Soi contento!
Ya tenén prestos es mostruos de l’animo en infantil del segundo trimestre. A buen seguro que son colgando de las neveras de las casas d’es borches, cambiando d’humor seguntes les paixca a’s dueños: que si ara soi contento, que si ara soi encarrañaú, que si triste… ¡Ya tienen prou faena ta uns diyas!
A clica de L’Aínsa será en Espiello
Un año més, y dimpués del paréntesis que nos va tocar sufrir, el proyeto “Cine en aragonés” torna a estar convidau a la Seción Cachimalla del Festival Internacional de Documental Etnográfico de Sobrarbe, Espiello.
El diya 25 de marzo a las 11:00 estrenarén 3 d’es 9 curtos que se van grabar en el curso pasau en el CEIP Asunción Pañart:
A fiesta de pixamas sin fin.
Cinco apellius aragoneses.
Un viache a Estaus Chunius.
Estiaño, como novedá, serén acompañaus per La compañera Yolanda Mur y es suyos curtos en aragonés fetos en la escuela de Fiscal. Que buens recuerdos me traye ixe centro… 🙂
Tos asperán. ¡Seguro que disfrutarén d’un estupendo maitín!
Atra de mostruos charramplas
Fa diyas que querrebe colgar esta entrada, pero no me vagaba per una cosa u atra. Ta empecipiar el trimestre von fer debuixos de vocabulario referiu a l’hibierno de bela traza. Astí van es resultaus d’es artistas.
www.lenguasdearagon.org, la web de las luengas d'Aragón
Con motivo del Diya de la Luenga Materna, la Dirección General de Política Lingüística ha presentau una web informativa sobre las luengas propias d’Aragón:
http://www.lenguasdearagon.org/
Entre es recursos videográficos i hai buena representación de la fayena qu’han feto toz estes años es borches del CRA Cinca-Cinqueta y CEIP Asunción Pañart.
Informe: Una grafía común para el aragonés y sus variedades
Esta tarde s’ha presentau l’informe encargau pe’l Gobierno d’Aragón ta mirar de conseguir una grafía común ta l’aragonés y las suyas variedaz. Es responsables han estau tres filologos de diversas universidaz europeas. Un d’es problemas que tiene ara mesmo l’aragonés ye la multitú de grafías que han proposau diferéns asociacións aparte de las que emplegan es charradors maternos cuan les toca escribir bela cosa. Ye mui complicau enseñar una luenga cuan no tiens una normativa en la que ampararse. A viyer si con esta iniciativa se puede a la fin contar con una base solida ya que’s docéns leván años sufrindo este problema. Podez descargar l’informe punchando en la foto.
San Antón de cartón
La semana pasada va estar la fiesta de San Antón. En la val de Chistau van salir es trucos a las carreras de toz es lugars a fer callaguar, a pesar d’es volturnos y la fredor. En clase es borches d’infantil tamién se van fer uns trucos, pero estes de cartulina. A pesar de ferlos sin batallo ta que no sonasen, ¡ya se van encargar els de foter buena tarramotera!
La educación pública mirando d'allegar a toz es puestos (u cuasi)
Es mayestros que itineran a veces se troban con empentizos en el camín. Este lunes tocaba puyar ta Chistén, pero con el nevazo qu’heba caito, va estar fayena imposible. Ni con sacanieus, ni con cadenas ni con cosa. La curva Sacos va estar la fin de la cursa…
Una ripa de felicitacións rondadoras
Estiaño en el CRA en aragonés hen feto unas felicitacións rondadoras. Cada escuela felicitaba a un atra con un vídeo que se proyetaba en el festival de navidá. Aquí las tenez:
A Espuña:
Bielsa:
Chistén:
Plan:
San Chuan:
Saravillo:
¡Que pasez buens diyas!
Ixa soi yo
Torna un clásico de las clases d’aragonés del CRA. El primer trimestre d’infantil ha estau adedicau al maletín con un cuerpo humano dentro. Hen pintau a rienda todas las partes, hen recortau, hen escrito es nombres de mans, peus, pancha… ¡Qué tremendos!
