Una berigüeta y una rabosa yeran tricolotiadas, asinas que pensón en estrapaciarse. Quedón en que cada una podeba’scarse os refuerzos que querrese. A o diya siguién, se presentarían en l’árbol que acordón.

A rabosa s’achuntó con un teixón, un lobo, un chabalín y un onso. Marchón ta o puesto que heban quedau, al canto de l’árbol. Alí estión asperando buens ratos, y cuan ya se’n rediban pensando de que a berigüeta no se atreviba a venir, esta se presentó con un cañuto en as costiellas.

Os animals grans, ya puez contar, se esmeligaban de risa cuan viyón que veniba sola. Pero a berigüeta les esbandió:
– ¡Vienga, cuan querriaz, empecipiamos!

Con que o teixón, a rabosa, o lobo, o chabalin y l’onso se le tirón dencima, a lo que a berigüeta ubrió’l cañuto. Alavez salión d’alí un ixambre d’abelletas que fizoniaban sin parar a aquels animals. ¡Ah, mamá! ¡Que manera de reclamarse de dolor!

A la fin, o teixón, a rabosa, o lobo, o chabalín y l’onso tenión que escapar a amagarse debaixo de l’augua en una basa que i heba cerca. Aquel diya aprendión que, a veces, ¡os chicoz resultan grans!

Fa abundantes años, un sastre que viviba en el lugá de Sin, va dí a coser ta Chistén. Como va tené fayena a rienda, cuan va querré torná ta casa, ya se le heba feto de noches. Con la luna, encá se i viyeba, asinas que va emprendé el camín.

Cuan yera a metá de cursa, va pasá al canto d’un barzal y se le va enganchá la faixa. En estas que una babieca que yera lucaniando dende un árbol cantaba:
– ¡Mius, mius!

L’hombre, espantau, se pensaba que yera un ladrón que’l agazapiaba ta sacale es dinés qu’heba ganau. Alavez le va contestá:
– ¡Que no, que son míos, que me’s he ganau troballando!
Y la babieca, que no teneba cosa milló a fé , le competiba:
– ¡Mius, mius!

Asinas van está toda la noche, basta que al rayá l’alba, el sastre va viyé a la babieca que se le’n rediba de como l’heba feto tontiá. L’hombre le va esbandí:
– Me pensabe que yera un ladrón, ¡y resulta que yere enganchau en un barzal con una babieca féndome la cinguanga! Si en vez de está una barza allegas a está un hombre, ¡te foto una pantegá!

I heba una vez un gato en una casa d’un lugar. Le deciban Chenaro, e toz es diyas se’n baixaba ta una femera a fer caca e pis.

Un diya, el engalzó una rabosa e le soltó:
-¡Chenaro, te voi a minchar!

E Chenaro le contestó:
– Ay, pobret, soi flaquizo de tot. No més tiengo que güesos. Mira, esta semana matarán el latón en casa. Una miqueta que me’n den e una miqueta que les ne pille, ¡me engordaré y alavez si que tendrás més carne!

La rabosa que no sabeba que fer, a la fin dició:
—Bueno, bueno, pos marcha.

A la semana tornó la rabosa per la femera, pero el gato que no i yera. Se’n fue e tornó al diya siguién, pero tampó el trobó. Chenaro que no baixaba per alí. Dica un maitín que le dio per asomarse a la casa, y el viyó que yera chetato al sol en el mirador. La rabosa le dició:
—Chenaro, ¿qué no vas agora ta la femera?
Y el gato le esbandió:
—¡No, no! ¡Agora me foi caca e pis dentro de casa!

I heba una vez una nina que se deciba Marieta. Un diya gandaniando per la Selva de San Chuan se va trobá a una bestia mui fieriza que le va soltá:
– Hola, como te dices? Yo soi el Chanrualla.
Marieta le va respondé:
– Hola, yo me digo Marieta.
– ¡Oh!¡Qué nombre mes pincho! -va contestá el Chanrualla- ¿Puez peiname ta sacame es piollos? Soi rabiando ya fa diyas y no i trobo qui me’l faya. Y si teneses bela coseta ta minchá, tamién me faría honra.
El chanrrualla se va acochá en la mandileta de Marieta. De tan a gusto que i yera, Al raté se va trespasá.

En ixas que la nina va pensá:
– ¡Mama mía, que espanto més gran! A viyé si puedo fuyí d’aquí sin que se de encuenta… Me sacaré la mandileta poquet a poquet…
Y alavez, va marchá a amagase ta casa. El Chanrualla, al rato va despertase.
– ¡Uaaaaaah! ¿An ye ixa zagaleta? Ha marchau sin decí cosa, y aquí s’ha deixau la mandileta. Le seguiré el bayo, ta sabé ta’n ha pegau. ¡Hola! ¡Y que fambre tiengo! ¡Ixa mesacha no m’ha dau cosa de minchá!
Y el Chanrualla, que va esnavesá dezaga d’ella, deciba entremistanto: – Marietaaaa, toma la mandiletaaa.
La nina, que yera mui espantá, ya feba ratos que heba tancau la puerta de casa con clau y se heba ficau en la cama. En estas que va allegá el Chanrualla.
– ¿Quí ha zarrau esta puerta? Ya puez contá que ixo me parará.
La bestia, d’un empentón, que se va foté ta’entro. A’scape va marchá cara ta las escaleras, y deciba:
– Marieeetaaaa, ya puyo la primera escalereetaa. Marieeetaaaa, ya puyo la segunda escalereetaa. Marieeetaaaa, ya puyo al rellaneeé.
Al allegar ta la puerta de la alcoba de Marieta continaba salamoniando:
– Marieeeetaaaa, ya te toco es pebeeez. Marieeeetaaaa, ya te toco la pancheta. Marieeeetaaaa, ya soy aquí… ¡ÑAAAAAM!
Y d’un bocau, se la va tragá. Asinas acaba este cuento, que dimpués de contau, per la chubinera s’ha escapau.

I heba rudio en la falsa,

alto al cabo la casa.

Alavez puyón t’alí.

Viyón a cinco mixins

tocando cinco vriolíns.

No yera un.

No yeran dos.

Ni yeran tres.

Ni yeran cuatro.

I heba rudio en la falsa,

alto al cabo la casa.

Alabez puyón t’alí.

Viyón a cinco mixins

tocando cinco vriolíns.

En infantil hen estau troballando con la tradición oral de la montaña. Con uns cuentos e imáns, hen diu féndolos en clase, chunto con bela ficheta relacioná. A la fin, tot el mundo s’ha levau ta casa el suyo libret y es suyos imáns. Ya tos dirén metendo todas las historias ta leyelas.