Tringol

Astí tenez la canción de la Orquestina del Fabirol que van cantá l’atro diya es borches.

Cuan yera chiquinín
¿qué feba el gatolín?
L’aprestabe una caixa
ta que fese pipí;
dimpués de prebatinas
-mama firme chilá-,
encertó a la fin dentro…
¡ya heba aprendiu a pixá!

Tiengo un mixín en casa
que le digo Tringol,
Tringol ye un buen amigo
y d’es gatos campión.

Un diya que tenebe
«nocilla» ta brendá
ta si le feba goi
le’n voi da a prebá.
Prou que si le’n feba…
y como va deixá
el pote laminando
¡sin calelo fregá!

Tiengo un mixín en casa
que le digo Tringol,
Tringol ye un buen amigo
y d’es gatos campión.

Ta que no le fizasen
piollos ni polegáns,
un diya ta la bañera
me’l voi llevá con yo.
Va fuyí zabucando
champús, potes, sabóns…
y encara toz s’alcuerdan
¡d’ixa revoluzión!

Tiengo un mixín en casa
que le digo Tringol,
Tringol ye un buen amigo
y d’es gatos campión.

Tringol ye cazataire,
en ye un d’es millós,
y como contrimuestra
trai ratos y muixóns.
Pero él i fa seguntes
la suya educación
y a cazata nos deixa
¡dencima el cobertó!

Asinas ye este gato,
asinas ye Tringol,
enchugardiu y libre…
y asinas quiero yo.

Una miqueta tarde, pero…

…ixo ye lo que i hai. U escribo en el blog, u apresto las clases, que ixo del aragonés no conoix el que son es libros de testo ta no més llegá ta clase y enganchá. Y per la cuenta que me trai…

L’atro diya va está bien la presentación del proyeto d»animación Luzia Dueso. Von tené de tot: mosica, teatro, discursos, chen,… y basta nos van da de brendá. Que més quies?

Von tené a la consellera de educación, cosa que no se vei toz es diyas per estes lugás. Ixo nos fa goi, perque paix que a la fin empecipian a tomase estes temas en serio dende la alministración.

Es borches del C.R.A. van está es encargaus de meter majo el local de la Sarra con murals d’es suyos lugás, y tamién ban cantá una cancioneta de La Orquestina del Fabirol. Con Tringol, la istoria d’un gato que en va fé gordas (y que l’en van fé!), van acabá la presentación. Yo cuento que el van fé a sabelo de bien, perque toz van aplaudí a rabiá y basta van salí en l’Heraldo. Como deciban es de la Orquestina: «como no parén cuenta, esta clica nos fan blincá de la mosica!»

Proyeto de animación «Luzía Dueso»

Dende fa uns años i hai un proyeto que trai atividaz en aragonés ta las escuelas. Estiaño ye el primé que le meten el nombre de Luzia Dueso, escritora de la Val de Chistau que Va morir el zagué marzo.

El diya 16, a las 18:00 se fará la presentación de la edición d’este curso en la Sarra de San Chuan. Tos asperán.

Entremistanto, la clica del Cinca-Cinqueta ye aprestando bela coseta ta recibí l’ato. Ya verez, ya.

Chistén

Aragonés en la escuela

Ixo ya fa diyas que pasa, lo que no s’heba bisto encara yeran materials prestos ta emplegá y que venisen dende la DGA. Ya tos voi decí fa bels meses que yere fendo este troballo con Pilar Benitez. La zaguera semana voi está en Teruel en la presentación d’estas unidaz didaticas de muestra del curriculo aragonés.

Podez viyé toz es troballos punchando en la imachen.

A plantá fuerte!

Tenebe que escribí esto ya fa diyas, pero entre replegá ta torná ta casa, marchá ta belas chornás y despedidas, no m’heba vagau.

Tos meto las fotos del diya de las luengas, de las obretas de moñacos que von fé en aragonés a la fin de mayo.  Van quedá prou bien, que la clica va troballá firme ta ixo. Que pasez buen verano y nos viyén per astí pe’l Sobrarbe a cualquiera momento.

A clica de L’Ainsa replega un premio!

Sin pensaye, ¡resulta que han dau un premio a’s borches d’aragonés del Asunción Pañart! Ye la primera edición del premio Esnabesar, del Charraire Fest que fan en Pandicosa ta’l 12 de chunio. Se vei que’l que hen fochau estes años en clase les ha feto goi. 🙂

Charraire fest

Si tos pasaz per alí ixe diya tenez mosica, chuegos infantils, la feria de l’aragones, charradetas, teatro… Tenez la información en la web de Charraire fest:

http://www.charraire.org/

Nos viyén alí. 😉

Qui no tiene cabeza tiene que tené peus…

Pos ixo, que teneben a Rafel Vidaller vesitando la nuestra escuela, y lo que menos he pensau ha estau en enganchá la camara ta fé fotos… Tendrá que está t’atra vez.

«Seguindo ro bayo» ye parte del «proyeto d’animación arredol d’a luenga e a cultura aragonesa». Lo que ha feto Rafel ye contá a’s borches como viven es onsos, y con ixa historia, podé  sabé una miqueta més de las plantas y bichos que dondean per es mesmos puestos.  Me pienso que lo que más goi l’ha feto a esta clica ye el de gustá es mesmos lamíns que es onsos: que si miel, que si mermelá de chordón, de ceresas, de abayons… Ya tienen el morro fino estes, ya. Si les hesen metiu bel carnuz, ya verín si’l hesen gustau…

Y buen, ya son rematando el curso d’aragones, pero encá nos queda la fin de la borina: el viernes farén unas obretas con moñacos en el diya de las luengas. Ya tos contarén que sale. De momento tendrez que conformazos con esta foto d’es ensayos de l’atro diya.

Y aquí, una animación de como sería ixe primé nivel del videochuego. A viyé si tos aprendez toz es movimentos que fan Lorién y Marieta.

Pero qu’hez feto toz estes meses que no se tos ha visto el pel?

Seguro que ixo diz belún viyendo como no feben mica bulla per aquí. Si tos ne corcordaz, ta chiné, charrabe d’unas atividaz con las partes del cuerpo.  Tot ixo el hen feto con un cuenté de dos borches que se dicen Lorién y Marieta y el concieto que van tené de emprendé un videochuego.  Pues con tot ixo hen rematau el trimestre con el mural que podez viyé en las fotos. A la fin, paix que la clica s’ha fotiu las pilas y han troballau que ta qué!