Entremistanto rematán es videos que faltan de editar, ta que la espera se faya més curta, von a dir sacando es que ya son prestos. El primer, el de la escuela de Saravillo. Como nos cuentan, cal cudiarse es dients cuan un ye encara a tiempo.
Este sabado, cine de la clica en Zaragoza
Ya tenén es diyas que se proyetarán es curtos del “II encuentro nacional de escolares” del Festival de cine de Zaragoza. Van a fer dos sesions, una el viernes 15 y atra el sabado 16 de noviembre. Es nuestros curtos se verán el sabado de maitins a partir de las 11:30 AM en el Centro Cívico Teodoro Sánchez Punter.
Toz es curtos finalistas recibirán un diploma acreditativo, asinas que si toz animaz belún a pasazos per Zaragoza, podrían pasar a replegarlos es borches ta que les den abundantes aplausos.
¡Estiaño tamién tornán ta’l Festival de cine de Zaragoza!
Acaba de salir la triga de curtos que participarán en el “II Certamen Encuentro de Escolares” del Festival de Cine de Zaragoza. Si tos alcordaz, l’año zaguer von quedar finalistas con “La cursa del submarino” del cole de San chuan.
Pero lo millor ye que esta vez participán con tres curtos, es de las escuelas de Bielsa, Laspuña y Saravillo. A viyer si i hai suerte, anque lo més important ya’l tenén: fer visible el troballo de clase tan bien feto d’es nuestros borches en una escuela rural.
Entremistanto allega estas nuevas tan buenas, contino troballando en rematar es atros 5 curtos que tenén pendients ta poder fer estreno dinantes de Navidat. El de Chistén ya ye al cayer, y el de Plan, el tiengo a bueno. Me quedan es de San Chuan, que como no espabile, ¡me sacan del lugar!
Per la escuela rural
[youtube=http://www.youtube.com/watch?v=c3KvdBn8UxM]
En l’heraldo d’Aragón
Aquí tenez el reportache del Heraldo escolar d’este mierqueles. ¡Ha quedau bien majo! Punchaz en la imachen ta baixarlo u viyerlo més gran.
El mierqueles salín en l’Heraldo d’Aragón
Este mierqueles nos fan un reportache en la seción del Heraldo Escolar per es videos y el premio Paseo Project Mini. ¡A viyer si nos sacan guapos!
No, no son muertos
Pos ixo, que con la fayena de comencipiadura de curso que tiengo, como coordinador TIC, fendo documentación nueva, encargarme del plan de formación de centro, clases y demás, le faltan horas al diya… Encara con ixas, soi rematando a la fin bels videos del curso pasau. A viyer si’s podén estrenar ascape. Entremistanto, astí van uns fotogramas de Bielsa y Laspuña.
Fotos de la presentación en Linz
Y ta rematar ya la sesión de fotos, tos cuelgo de la presentación, que encara no me las heban pasau. ¡Y no las podebe fer yo en ixe momento!
Galería de fotos
Ya son atra vez a la marcheta de toz es diyas: conoixendo a’s compañers nuevos y saludando a’s que son de contino u repiten.
Ya més tranquilos y en casa, aquí van una zarpada de fotos de las nuestras aventuras per Linz. Una ciudat bien pincha, de diya y de nuet.
El sabado me voi quedar sin batería ta poder grabar una miqueta de la Klangwolke, el espetaculo audiovisual que fan al canto del Danubio y que estiaño yera adedicau al mosico Anton Bruckner. Per suerte, en estes tiempos, no cal més que rechirar en youtube ta trobar videos que te fayan la vez.
Con esta cursa, hen preniu fuerzas abundantes ta empecipiar el curso con ganas. ¡A troballar!
Tornando ya ta casa
Ya son en el tren de camín ta Viena. S’han pasau estes diyas sin darnos en cuenta, y maitín ya toca enganchar. Nos ha faltau tiempo ta poder disfrutar de tot lo que i heba en Linz, pero es diyas sólo tienen 24 horas y cal dormir… En cuanto podián, tos colgarén el reportache del viache, ta que to’l mundo sia partícipe de esta oportunidat que han teniu Victoria e Irene.
Tenén que dar gracias a José Carlos, de la Fundación Zaragoza Ciudad del Conocimiento, y Mariano de Paseo Project Mini. Nos han llevau en palmetas a toz es puestos, y estando una compañía de lo més agradable. ¡Con chent asinas, puez marchar ta la fin del mundo!