¡Estiaño tamién tornán ta’l Festival de cine de Zaragoza!

Acaba de salir la triga de curtos que participarán en el “II Certamen Encuentro de Escolares” del Festival de Cine de Zaragoza. Si tos alcordaz, l’año zaguer von quedar finalistas con “La cursa del submarino” del cole de San chuan.

Pero lo millor ye que esta vez participán con tres curtos, es de las escuelas de Bielsa, Laspuña y Saravillo. A viyer si i hai suerte, anque lo més  important ya’l tenén: fer visible el troballo de clase tan bien feto d’es nuestros borches en una escuela rural.

Entremistanto allega estas nuevas tan buenas, contino troballando en rematar es atros 5 curtos que tenén pendients ta poder fer estreno dinantes de Navidat. El de Chistén ya ye al cayer, y el de Plan, el tiengo a bueno. Me quedan es de San Chuan, que como no espabile, ¡me sacan del lugar!

Lugar de escaixalaus

No, no son muertos

Pos ixo, que con la fayena de comencipiadura de curso que tiengo, como coordinador TIC, fendo documentación nueva, encargarme del plan de formación de centro, clases y demás, le faltan horas al diya… Encara con ixas, soi rematando a la fin bels videos del curso pasau. A viyer si’s podén estrenar ascape. Entremistanto, astí van uns fotogramas de Bielsa y Laspuña.

01 Bielsa

02 Laspuña

Fotos de la presentación en Linz

Y ta rematar ya la sesión de fotos, tos cuelgo de la presentación, que encara no me las heban pasau. ¡Y no las podebe fer yo en ixe momento!

Galería de fotos

Ya son atra vez a la marcheta de toz es diyas: conoixendo a’s compañers nuevos y saludando a’s que son de contino u repiten.

Ya més tranquilos y en casa, aquí van una zarpada de fotos de las nuestras aventuras per Linz. Una ciudat bien pincha, de diya y de nuet.

El sabado me voi quedar sin batería ta poder grabar una miqueta de la Klangwolke, el espetaculo audiovisual que fan al canto del Danubio y que estiaño yera adedicau al mosico Anton Bruckner. Per suerte, en estes tiempos, no cal més que rechirar en youtube ta trobar videos que te fayan la vez.

Con esta cursa, hen preniu fuerzas abundantes ta empecipiar el curso con ganas. ¡A troballar!

Tornando ya ta casa

Ya son en el tren de camín ta Viena. S’han pasau estes diyas sin darnos en cuenta, y maitín ya toca enganchar. Nos ha faltau tiempo ta poder disfrutar de tot lo que i heba en Linz, pero es diyas sólo tienen 24 horas y cal dormir… En cuanto podián, tos colgarén el reportache del viache, ta que to’l mundo sia partícipe de esta oportunidat que han teniu Victoria e Irene.

Tenén que dar gracias a José Carlos, de la Fundación Zaragoza Ciudad del Conocimiento, y Mariano de Paseo Project Mini. Nos han llevau en palmetas a toz es puestos, y estando una compañía de lo més agradable. ¡Con chent asinas, puez marchar ta la fin del mundo!

Primer diya capuzau

Dimpués d’un largo diya de esperiencias nuevas, son descansando una miqueta en l’hotel ta tornar a prener fuerzas.

El maitín ha empecipiau fuerte, con la vesita al Ars Electronic Centre. Lo primer que hen feto ha estau darnos una gambiadeta per tot es montaches e instalacions. I heba un rabaño, e Irene y Vitoria  se’l han pasau bomba, perque aquí tot ye tocar, esperimentar, participar…

Allá a la una, dimpués d’atender a una entrevista de Radio Zaragoza (¡a estas ninas las contrato de relacions publicas pero ya!), ha tocau presentar el nuestro proyeto de cine en aragonés. La chen ha quedau prou impresionada de la fayena qu’han feto toz estes borches. ¡Incluso el diretor del festival nos ha felicitau!

Dimpués de minchar un plato de pasta con camparols en el restaurant del museo Lentos d’arte moderno de Linz, nos hen ficau a viyer belas esposicions que teneban. Hen puisto disfrutar d’obras de chen que de seguro tos suena a’s més estudiosos: Warhol, Klimt,… y ta’s frikis como yo, Giger, el que va diseñar el mostruo d’Alien.

Ta rematar la tarde, nos n’hen diu ta’l OK centrum, ta viyer unas cuantas instalacions d’arte. Alí hen aprendiu que basta con las gallinas se puede fer arte. Asinas que ya sabez: si tenez un corral en casa, ¡tamién podez estar creativos!