Como cada año, el CRA Cinca-Cinqueta será en la Ferieta de L’Aínsa vendendo artesanías ta recaudá fondos ta Pro Activa Open Arms y Sos Refugiados.
Podrez trobá el que viyez en la foto y abundantes cosas més, como tazas de desayuno o es Cuentos de Cadiera que van fé es borches del CRA. ¡Nos viyén el domingo de maitín!
Arriba un cuento de la escuela de Saravillo: La suerte del mercadé. Ye la historia d’un mercadé que rodaba per tot Sobrarbe y emprende cara ta la Val de Chistau con el burro cargau de trastes ta vendé.
No cuento que calga recordalo, pero se pue conseguí en la nuestra tienda punchando en la portá del cuento. Estes diyas te’l mandan de baldes con correu económico u con un 50% de descuento si se fa con ninvio terrestre. Emplega el código ONESHIP. Toz es beneficios de las ventas serán ta una ONG.
Un nuevo cuento a la venta de la nuestra coleción: El sastre y el muxón. En tiempos i heba sastres que marchaban a cusí ropa per estes lugás, y de cabo a cuan les pasaban cosas pe’l camín.
Como siempre, puez conseguilo en la nuestra tienda punchando en la portá del cuento. Amés, estes diyas i hai un 15% de descuento con el código LULU15. Recuerda que toz es beneficios de las ventas serán ta una ONG.
En las zagueras semanas una caterva de medios de comunicación s’han feto eco de la coleción “Cuentos de Cadiera” que von fé en en las clases d’aragonés: pedioricos, radios, webs… Aquí podez sentilos y viyelos toz.
El tranvía verde (Aragón radio)
Radio Sobrarbe
Cope Pirineos
Ta comencipiá l’año, sacán a la venta un nuevo cuento de la nuestra coleción: El malur de las mulas. Cuenta el misterio d’una casa que teneba abundantes desgracias con el bistiá, ya que siempre se les moriba el milló animal…
Puez conseguilo en la nuestra tienda punchando en la portá del cuento. Amés, estes diyas te’l ninvian de baldes con el código ONESHIP. Recuerda que toz es beneficios de las ventas serán ta una ONG.
Este curso mirarén de rematá un mural d’es nuestros lugás que nos valdrá tamién ta repasá vocabulario. ¡De momento ya leván buena marcha!
El primé trimestre d’infantil, con toda la patolea de borches chiquez qu’han entrau este curso al CRA yera la situación ideal ta empecipiá con una cosa que sia familiá ta éls. Per ixo hen troballau con l’animo.
Este trimestre en primaria el hen adedicau a troballá con es Cuentos de Cadiera. Ara que a la fin contán con abundante buen material de letura feto per nusatros, hen troballau la comprensión letora con es nuestros relatos y la aplicación Kahoot en es portátils d’aula. D’esta traza es borches troballan la suya competencia letora en aragonés y a la vez se’l pasan pipa.
Leván tiempos charrando d’este proyeto en la web, anque no heben espuntau guaire de que i diba. Ya ye conoixiu de sobra en las nuestras escuelas, pero allega el momento de felo público a to’l mundo.
Cuentos de Cadiera ye una proyeto escolá que tiene como ochetivo torná a da vida a la tradición oral d’es nuestros lugás. El nombre viene del puesto an qu’estes cuentos van pasá de pais a fillos u de güelas a nietas, y els cuals han perdiu protagonismo con la vida d’ara y es nuevos entretenimentos.
Es borches de las escuelas se van encargá de ilustrá varias historias de la zona que han dau como resultau una coleción de cuentos en las variedaz d’aragonés del CRA. Nusatros ya son disfrutándolos en las nuestras casas y en las bibliotecas d’es coles, y con els hen puisto troballa la comprensión letora y oral en aragonés.
Cuentos de Cadiera ye un proyeto solidario, ya que toz es beneficios d’es cuentos que se vendan se donarán a las ONGs que han eslechiu es borches en las escuelas.
Es primés cuentos que sacán son estes cuatro: «Es dedos», «El gato Bru», «Felipón y o caballo furo» y «La raboseta». Ta podelos conseguí sólo tiens que punchá en este enlace:
¡Asperán que tos fayan goi!
En chiné esta web cumplirá ya 10 años d’andadura. Per las mías clases ha pasau una pila d’alunnau, el cual ha estau el protagonista d’es contenius qu’hen diu publicando en internet. Dimpués de tot este tiempo, ya yera hora de fé una reforma a la web. Una de las cosas que no trobarez falta será la propaganda que saliba (ara tenén servidó propio). Queda bel rincón per atrapaciá, que caldrá felo poquet a poquet. Tamién i habrá novedaz importantes, que no tardarán guaire a salí. ¡Sez atentos!
Asinas pos, queda inaugurá la nueva laclica.net. Atualizaz es vuestros favoritos, ya que la web viella se tancará. Y si tos fa goi , tamién podrez seguinos en Instagram. ¡Aspero que tos guste!
