Son mui contentos, perque el zagué troballo de la nuestra clica ye tenendo abundante repercusión en es medios de comunicación: radio, prensa escrita, internet…
El tranvía verde (Aragón radio)
Carnaval: nuevo libro en a’spuñés, belsetán y chistavín
El mes de febré ye carnaval en es nuestros lugás, asinas que ye el milló momento ta presentá el nuevo proyeto qu’hen feto en las clases d’a’spuñés, belsetán y chistavín.
“Carnaval” ye un libro ilustrau que presenta es presonaches d’es carnavals tradicionals de las nuestras localidaz. Con él, y gracias a vecins de cada puesto, tamién hen recuperau información sobre carnavals que fa decadas que no se celebran, como es d’A Espuña u Saravillo. El libro se puede conseguí entrando en la nuestra tienda punchando aquí. Toz es beneficios de las ventas se donarán a una ONG. ¡Asperán que tos faya goi!
100%
El curso 2019-2020 ye el primé en el que i hai una matrícula del 100% de l’alunnau del C.R.A. Cinca-Cinqueta en las clases d’aragonés.
Dend’aquí doi las gracias a las familias per confiá en la fayena feta en l’area toz estes años. ¡Mersi!
Murals de lugás
Que milló que fé un mural d’es nuestros lugás en el cual se puede aprendé vocabulario del entorno. ¿Cuál tos fa més goi? ¿Saravillo, San Chuan, Plan, Bielsa, A Espuña u Chistén?
Es “Cuentos de cadiera” baixan de precio
Ya fa un año que von publicá este proyeto de recopilación de la tradición oral de las nuestras localidaz. Con él, aparte del componén didático de la iniciativa, tamién hen puisto recaudá 180€ donaus a ONG’s como Open Arms u S.O.S. refugiados. Si yes interesau en conseguí belún d’es cuentos, ara ye el momento, ya que con la redución d’es costes d’edición, hen puisto baixá es precios. Son un regalo bien majo ta estas fechas y como ya hen dito, el beneficio íntegro de las ventas se destina a ONG’s.
Vocabulario con es mostruos charramplas
Hen estau troballando nombres de plantas del güerto, asinas que es mostruos charramplas ya tienen fayena ta decí parolas. En esta ocasión, es debuixos es hen feto con l’ordenadó.
Més materials
Deixo disposable en la seción de materials didáticos un nuevo apartau con dioramas ta troballá vocabulario.
La escuela de Bielsa, en la tele
Tos deixán el vídeo del programa d’ayere en Aragón televisión. ¡Que bien el fan estes borches!
Cosas de clase
Ya son en marcha en las clases d’aragonés un curso més. Ta comencipiá, podez viyenos este domingo a las 10:20 en Aragón televisión en el programa “Cosas de clase”, que va vení a grabanos a la escuela de Bielsa t’amostrá las cosas que fon.
“Árboles ilustrados”
El sabado pasau la asociación cultural El cillo va inaugurá la esposición “Árboles ilustrados” en Espierba. L’alunnau de la escuela de Bielsa ha colaborau en varios panels con es suyos debuixos. En las clases de belsetán se van fé sobre refráns d’es meses de l’año.
Fotos: Asociación El cillo.
