Aquí tenez una historia una mica rematá que von fé en Bielsa ta’l festival de Navidá. Basta pocos diyas dinantes no se me va ocurrí que podeben fé, y asinas me va di, que ta rematá la fayena d’edición a tiempo va tocar trasnochá abundante… Suerte que es borches van está profesionals que ta qué. Con el poco tiempo que von tené, y que’n i hai que no charran mica, la cosa ha quedau bien maja. Y como se vei que no’n he teniu prou, ara me paix que prebaren de fé més d’esto con todas las escuelas. Si no se sabe cosa més de yo, será que he crabutau en l’intento!
L’animo
Seguntes el diya i hai veces que son contentos, atras carrañosos, atras tristes… En infantil hen estau troballando una mica es estaus d’animo. Como belas parolas son igual en castellán que en aragonés, he rechirau una miqueta ta viyé si trobaben beluna que estase sinonima de las que emplegán de contino. ¡Igual son desmasiau retorteras!
Fotos del taller d’ayere
Como ya tos voi contá, ayere nos va vesitá Rafel Vidaller. A traviés de conoixé cómo viven es onsos, von aprendé qué atros animals viven per las nuestras selvas, belas plantas y las suyas aglós. Tamién von gustá mermelás fetas de frutas que les fan goi a’s onsos, como es martuels, es chordéns, las ceresas, es abayóns…
Empecipian las atividaz del Luzia Dueso
Este lunes tornan ta’l C.R.A. las atividaz del proyeto Luzia Dueso. Rafel Vidaller vendrá ta las escuelas de Saravillo y Chistén a fé el taller “Fendo ciencias naturals”. Ara son troballando animals y plantas en primaria, asinas que nos viene de pistón.
Conforme pase el curso, dirén fendo més cosas per las atras escuelas, ta que’n toque ta toz!
¡Ya ye carnaval!
Per estas vals fa diyas que ya s’han pasau es de Chistén y de San Chuan.
El muyén de Chistén
Ara tocan es de Bielsa, pero ixes estiaño se tornan internacionals. La escuela activa Ermilo Abreu Gómez de México han contatau con nusatros ta fé el carnaval como es d’aquí. Se vei que les va fé goi lo que von troballá el zagué curso!
¡Cucos en la nevera!
A cualquiera que le digas que tiene la nevera plena de cucos, de seguro que se espanta abundante. Pos d’ixo se trataba esta atividá. Es ninos de primaria se van fé uns imáns con cucos que podén viyé per aquí, ta dimpués tomales el pel a’s pais suyos en casa. Si es que no discurrín cosa buena…
El cuento de nunca acabá
Ya sabén que a’s ninos de infantil les fa abundante goi sentí cuentos, y que si per els fuese, nunca en tendrían prou. Ta apañá el problema, no cal més que emplegá el cuento qu’hen feto en clase. Alí podén viyé tot el que fan es chicoz cada diya en casa y en la escuela. Ixo sí, el que el tienga que leer, que se apreste, que cuan paix que s’acaba, torna ta la empecipiadura. Ta ratos en tiene…
La ringlera del tiempo
Ya fa diyas que von rematá esta atividá, pero no m’ha vagau de metelo per internet basta ara. Y una mica més y nian el puedo fé ta las vacancias…
Bueno, que sepiaz que no hen estau paraus dende otubre, y von comencipiá el curso con un mural gran an que von troballá el paso del tiempo. D’ixa traza es borches van fese una mica a la idea de como corren es años, y de lo poco que hen viviu nusatros la vida d’estes lugás. I hai muchas casas que encá tienen en el portal l’año en que las van fé, y tamién tenén fotos ta sabé como yera la chen dende fa 100 años. De la chen de tiempos más de dinantes ye difícil sabé cosas, pero si mirán en es cuadros d’es museos, tamién podén fenos idea. Como nusatros no’n tenén a man, von aprovechá es tablets de clase ta mirá en google a viyé que trobaben.
Hala, en uns diyas nos entrepuzán per ixas carreras, que las vacancias ya cuasi nos las hen bufau de tot. ¡Feliz año!
L’orache
Caldrá empecipiá a meté el que fon en clase con es borches. Si no, ¡va a paixé que no més son to’l diya mirando ta’l sol!
El primé que hen troballau con es chicorróns ha estau conoixé l’orache que fa per estes lugás. Tenén sol, boiras, nieu, tronás, aire, bela pedregá… Con tot ixo hen chugau a trobá las parellas. Con las cartas cara t’abaixo, cal chirane dos. Si son iguals, te las quedas, y si no, pasa el turno ta l’atro. Asinas basta que s’acaban.
Tamién hen feto uns imáns ta meté en las neveras. ¿Verdá que fan majo?
Contina el proyeto Luzía Dueso
Fa uns diyas se va vociá que’l Departamento d’Educación feba plegá las atividaz d’es proyetos culturals en catalán y aragonés Jesus Moncada y Luzia Dueso. A la fin, no més el han feto con el programa catalán, y de momento contina el d’aragonés.
Esperán que ta’l curso que viene no’l saquen, perque este proyeto premite trayé a las nuestras escuelas atividaz que d’atra traza no podrín tené per el puesto an que son y la custión economica. Me pienso yo que i hai atros gastos en la alministración an que pueden retallá, que no son menisté y que son prou més caros que estes…
