Ya van ta deván las peliculetas qu’hen feto este trimestre en primaria. Encara falta grabá bel audio y montalas, pero yo cuento que las tendrén prestas ta la fin del curso. Tenén historias de miedo, de ciencia-fición, d’amor y borina… Una mica de tot. Astí va un adevanto.
La carrachina
U ta nusatros, la caragola. Ixe ye el titulo del cuento en cheso que nos van fé Pol y Chusé dentro del proyeto Luzia Dueso en San Chuan y Plan. Amés nos van deixá uns murals bien pinchos ta pintalos. Esta ha estau la zaguera atividá en este curso. Esperán que ta’l que viene no nos toquen més retallos y encara podián trayé a més chen ta fé cosas en aragonés.
Escuela rural
Escuela publica: de toz ta toz
El proyeto Luzía Dueso allega a Plan y a San Chuan
Teneben pendiente fer la atividá del proyeto Luzía Dueso en estes lugás, asinas que este lunes acudirán Pol, el mayestro d’aragonés de las escuelas de Chaca, y Chusé Bolea, ilustradó d’abundantes libros en aragonés. ¡A viyé que nos cuentan y debuixan!
¿Án soi?
Es més chicorróns tampó se van está paraus en el segundo trimestre. Menudo libré móvil qu’hen pintau y apegau entre toz. que si son alto, que si son abaixo, que si son per dencima, que si son per debaixo, que si nos quedán dentro si fa mal orache, que si salín ta difuera si fa güen… Qué trachín!
Historias d’onsos
Astí son las fotos de la atividá del proyeto Luzía Dueso que va puyá el chueves ta Laspuña y Bielsa. Alberto Gracia nos va contá historias d’onsos y como son estes bichos. La cosa se vei que yera interesante, perque no se’n va tartí dengún…
El proyeto Luzía Dueso puya ta’ Espuña y Bielsa
Este chueves tenén cuentos en ixes lugás con el proyeto Luzia Dueso. Nos vesitará Alberto Gracia, escritó y mayestro d’aragonés en la escuela de L’Ainsa. En uns diyas tenez la cronica de tot el que pase.
Fete con toz!
Qué milló traza de aprendé cosas de las plantas y es animals que se viyen per estes puestos que chugando. El segundo trimestre nos hen entreteniu en fé un faixo de cartas an que podén trobá las suyas carateristicas: el que miden, el que viven, el que minchan, lo periglosos que son… Con ixo comparán cartas, y el que echa la més fuerte, se leva la baza. Qui se queda con todas, ye el que gana. ¡Ni que estase esto es pokemons!
La enrestida del profesó Mesié
Aquí tenez una historia una mica rematá que von fé en Bielsa ta’l festival de Navidá. Basta pocos diyas dinantes no se me va ocurrí que podeben fé, y asinas me va di, que ta rematá la fayena d’edición a tiempo va tocar trasnochá abundante… Suerte que es borches van está profesionals que ta qué. Con el poco tiempo que von tené, y que’n i hai que no charran mica, la cosa ha quedau bien maja. Y como se vei que no’n he teniu prou, ara me paix que prebaren de fé més d’esto con todas las escuelas. Si no se sabe cosa més de yo, será que he crabutau en l’intento!