Bueno, no von allegá a tanto. 😉 A la fin no va podé está y es ganadós del concurso de bitacoras de la Somonparty van está “Mamis y Bebés” en la categoría cheneral, y “Purnas en o Cierzo” en la de milló de l’Alto Aragón. Les dan la norabuena, y son contentos de que esto haiga valiu ta que se conoixca una miqueta més que l’aragonés ye dentro de la escuela. Au, me’n torno a apurá las vacancias, que ya no’n queda guaires…
Son finalistas de la Somonparty
A la fin con es votos de toz vusatros hen quedau entre es 10 primés. ¡Gracias per la vuestra aduya! A viyé en que queda tot esto… Maitíns tos digo bela cosa. Entremistanto, la Somonparty ya ha empecipiau. I hai atividaz ta to’l cabo de semana.
Apurando las vacancias
Paixeba que serían larguismas y ya son casi zabucás… No més escribo ta decí que ta’l 1 de setiembre la Clica del Cinca-Cinqueta tornará a da ferrete ta’l curso 2011-2012. A viyé qué fon estiaño ta fé marchá l’aragonés per ixas vals. De momento ya tiengo bela cosa bullindo en el crabacín…
¡Ah! Dinantes que se m’olvide: l’atro diya leendo sobrarbenses me va da per presentá el blog al concurso de bitacoras de la somonparty. Si querrez votá per nusatros, y que se sepa bela cosa más de lo que charrán per aquí, no tenez més que punchá debaixo.
Y cuento contau… ¡per la chubinera se ha escapau!
Nos ne von de vacancias, sí, pero no nos podeben di sin fé una miqueta de despedida. Von emplegá belas historias d’ixas que se feban al canto del fogaril ta fé comedia con moñacos de papel. A viyé si ta la prosima vez tiengo tiempo ta fene belún més, que “L’arangután de las Paniellas”, “El sastre y el muxón” y “El chanrrualla” ya han navegau per casi to’l Sobrarbe. 😛
Buen verano y no pasez guaire calor. ¡A viyé si nos tornán a trobá luego per estas vals!
¡Ixe soi yo!
Es ninos de infantil han estau to’l zagué trimestre replegando el suyo cuerpo en la maleta ta disene de vacancias. Un cuenté ta conoixé que tienen crabacín, mans, garras, peus… De seguro les ha feto goi as suyos pais, perque han troballau firme.
El que cierne y masa…
…de todas le’n pasa!
Son aprestando con es de primaria unas obretas con cuentos que se’han feto toda la vida per estes lugás. En las prebatinas de Saravillo von tené un problema con es decoraus, que se vei encá no teneban prou apegaus es ganchos an se teneban. Astí ye el vídeo:
¡Cal que no pase esto cuan fayán las representacións!
Lacuercos
Con el buen orache de la primavera paix que salen més d’es foraus… Si tenez ninons paraz cuenta per casa. Echaz un miqueta de zenisa pe’l suel ta viyé si’n i hai belún.
El dotó Escrabacinau va esnavesá ta Benás
Bien pocos conoixen la historia de est’hombre de la Val de Chistau.
Incomprendiu en la suya epoca, va fé inventos que nian ara se han visto encara. Gracias al proyeto d’animación cultural Luzia Dueso, es ninos que emplegan el aragonés en la escuela, podrán sabé tot el que le va pasá al dotó Escrabacinau.
Benás va está el primé puesto an van viyé las tramenas de est’hombre y la suya aduyanta, la dotora Ababol.
El proyeto Luzia Dueso, en Bielsa
Dinantes de marchá de vacancias, la orquestina va fé una vesita a’s borches de Bielsa. Von prebá una ripa d’istrumentos que trayeban, y tamién von fé “karaoke”.
Carnavals caducaus
Mira que se fan largos es carnavals en Sobrarbe y nian asinas, m’ha vagau de fé esta entrá a tiempo. Estes meses de dezaga nos hen feto uns librez con toda la chen que amaneix per es carnavals de Bielsa y Chistau. ¡En i hai un rabaño! Per ixo no von rematá la fayena basta cuasi Semana Santa…
