El primé trimestre d’infantil, con toda la patolea de borches chiquez qu’han entrau este curso al CRA yera la situación ideal ta empecipiá con una cosa que sia familiá ta éls. Per ixo hen troballau con l’animo.
Cuentos de cadiera como recurso ta troballá la comprensión oral y letora
Este trimestre en primaria el hen adedicau a troballá con es Cuentos de Cadiera. Ara que a la fin contán con abundante buen material de letura feto per nusatros, hen troballau la comprensión letora con es nuestros relatos y la aplicación Kahoot en es portátils d’aula. D’esta traza es borches troballan la suya competencia letora en aragonés y a la vez se’l pasan pipa.
Cuentos de Cadiera
Leván tiempos charrando d’este proyeto en la web, anque no heben espuntau guaire de que i diba. Ya ye conoixiu de sobra en las nuestras escuelas, pero allega el momento de felo público a to’l mundo.
Cuentos de Cadiera ye una proyeto escolá que tiene como ochetivo torná a da vida a la tradición oral d’es nuestros lugás. El nombre viene del puesto an qu’estes cuentos van pasá de pais a fillos u de güelas a nietas, y els cuals han perdiu protagonismo con la vida d’ara y es nuevos entretenimentos.
Es borches de las escuelas se van encargá de ilustrá varias historias de la zona que han dau como resultau una coleción de cuentos en las variedaz d’aragonés del CRA. Nusatros ya son disfrutándolos en las nuestras casas y en las bibliotecas d’es coles, y con els hen puisto troballa la comprensión letora y oral en aragonés.
Cuentos de Cadiera ye un proyeto solidario, ya que toz es beneficios d’es cuentos que se vendan se donarán a las ONGs que han eslechiu es borches en las escuelas.
Es primés cuentos que sacán son estes cuatro: “Es dedos”, “El gato Bru”, “Felipón y o caballo furo” y “La raboseta”. Ta podelos conseguí sólo tiens que punchá en este enlace:
https://www.laclica.net/cuentosdecadiera/
¡Asperán que tos fayan goi!
¡Nueva web!
En chiné esta web cumplirá ya 10 años d’andadura. Per las mías clases ha pasau una pila d’alunnau, el cual ha estau el protagonista d’es contenius qu’hen diu publicando en internet. Dimpués de tot este tiempo, ya yera hora de fé una reforma a la web. Una de las cosas que no trobarez falta será la propaganda que saliba (ara tenén servidó propio). Queda bel rincón per atrapaciá, que caldrá felo poquet a poquet. Tamién i habrá novedaz importantes, que no tardarán guaire a salí. ¡Sez atentos!
Asinas pos, queda inaugurá la nueva laclica.net. Atualizaz es vuestros favoritos, ya que la web viella se tancará. Y si tos fa goi , tamién podrez seguinos en Instagram. ¡Aspero que tos guste!
Cuentos de Cadiera en Bielsa
E ya sólo nos quedaba Bielsa pa presentar es Cuentos de Cadiera. No cal fer asperar més, asinas qu’este viernes 26 a las 18:00 en el salón del Ayuntamento faremos la presentación. Per supuesto, ¡tamién contaremos cuentos!
Las bruixas
El 30 d’otubre farén una trobá de convivencia de tot el CRA en Plan. La temática serán las bruixas, ya que nos han allegau historias sobre la suya presencia en estas vals. Y sobre tot, per si tenesen relación, querrén investigá es acontecimentos que son pasando en bels lugás dende fa uns diyas…
Cuentos de Cadiera en Plan
¡Esto ye un no pará! Es Cuentos de Cadiera se presentarán dentro del programa d’atividaz de la Feria de Plan. El diya 11 d’otubre en el Salón de la casa del lugá a las 18:00 contarén cuentos y dimpués brendarén con chicolate. ¡Tos asperán!
Cuentos de cadiera en A Espuña
Continán la chira per es lugás del CRA presentando el proyeto. Este martes 9 serén en la escuela d’A Espuña a las 17:30. al rematá la presentación ¡farén brenda y tot!
¡Mersi!
Ya son en marcha en el nuevo curso y con mui buenas noticias. De nuevo tenén record de alunnau en aragonés, con el 93% d’es ninos y ninas del CRA apuntaus a las nuestras clases.
Doi las gracias a las familias per confiá en la fayena que s’ha feto en estes años y per apostá ta que la suya luenga sia parte de la educación d’es suyos fillos.
Cuentos de Cadiera en San Chuan
Y como no tenén prou de fiestas, el 23 a las 19:00 farén una visita a las de San Chuan. Es nuestros cuentos ubrirán las celebracións del lugá. ¡Nos viyén alí!
