Astí va la entrevista en el programa Hoy por Hoy de Radio Huesca del martes pasau. Ta que tos entretenguiaz entremistanto allegan nuevas de Linz.
Noticias, entrevistas… ¡Esto ye un no parar!
Tos cuelgo la noticia que van emitir l’atro diya en radio Sobrarbe sobre la cursa ta Linz.
Este maitín, entre maleta y maleta en San Chuan, tamién han gritau de Radio Huesca ta ferme entrevista. A viyer si la puedo meter per aquí dinantes de marchar.
¡No nos queda cosa ta marchar!
¡El chueves esnavesán ta Linz! Ya’l tenén tot presto ta que se proyeten es curtos en el Ars Electronica Center. Podrán viyerse sutitulaus al inglés y con to’l montache del dvd que von fer. Meto el video completo ta que’l pueda viyer to’l mundo. ¡Menuda cantera d’ators que i hai en este C.R.A.!
U19. Create your world
Poco a poco von sabendo detalles de la nuestra vesita a Austria en setiembre al Ars electronica. De momento, ya salín en la suya web, dentro de la seción U19 – CREATE YOUR WORLD – PRIX ARS ELECTRONICA.
El diya 6 nos tocará fer la presentación del nuestro proyeto chunto con atros de Austria, Alemania, Hungria y Suiza.
Atro año més
El 9 de setiembre nos viyén pe’l C.R.A. ¡A grabar més nevazos per ixas carreteras! 😉
Entrevista en Radio Zaragoza
Maitín viernes nos entrevistarán en “Hoy por hoy Zaragoza” en la cadena Ser a medodiya per el premio Paseo project mini. Se podrá sentir punchando aquí trigando Radio Zaragoza.
Y las ganadoras son…
¡Irene, de San Chuan, y Victoria, de Laspuña! A ellas les toca representar el nuestro proyeto en la seción U19 de Ars electronica chunto con proyetos de toda Europa. El sorteo s’ha feto sacando es numeros correspondients de traza aleatoria en l’ordenador de la capoleitor 3000. No tos apurez que ya tos farén buen reportache fotografico de la nuestra vesita a Linz.
¿Qui i dirá ta Austria en setiembre?
Tos recuerdo que tenén pendient las dos plazas ta fer la presentación d’es videos en el festival Ars electronica que se celebra en Linz (Austria). Faré un sorteo entre toz es borches del 3º ciclo que sian interesaus en fer la cursa a esta ciudat del 5 al 9 de setiembre. ¡Maitín tos digo el resultau!
Curso acabau
Y ya van tres en el C.R.A. ¡Qui me’l diba a decir!
Ta’l festival de la fin del curso von estrenar el curto qu’ hen feto en Saravillo. Se diz “Lugar d’escaixalaus”, y ta no perder el costumbre, ye una mica escrabacinau. En uns diyas el colgaré d’internet ta que’l puda viyer to’l mundo.
No hen teniu prous diyas de curso, asinas que no ha dau tiempo a rematar las atras 7 peliculas que hen aprestau. Tal cual se vayan rematando, i dirán salindo per aquí.
Ixo sí, esta fayena que queda per fer, la atrapaciaré estando desemplegau. Este ye el primer curso en el que a’s interinos nos mandan al paro en verano, y con el delito de ferlo dimpués d’habernos contratau ta tot l’año a comencipiadura de curso. Ixe ye el respeto que se tiene dende Zaragoza pe’l troballo que hen feto con l’aragonés y el resto de materias impartidas per es míos compañers en las escuelas d’estes lugars. Ya que la almenistración no para mica cuenta de que la escuela publica permita tener a toz las mesmas oportunidaz, ya meterén tot lo que se precise la chent que nos tomán en serio la educación d’es borches d’estes lugars. Yo i diré per la carrera con la cara bien alta. Atros ni an pueden salir de casa. Per bela cosa será…
Como basta agosto no se sabrá si tornaré pe’l C.R.A. Cinca-Cinqueta, y me van enseñar en casa a estar educau, tos doi las gracias a toz per sentirme como en casa en toz en lugars. Que pasez buen verano y si no nos viyén per es coles, ¡ya nos viyerén per ixas carreras!
Las delerias del dotor Escrabazinau y de la dotora Ababol
Estes dos cientificos tamién han pasau per las clases d’infantil. El tercer trimestre hen investigau una mica con els sobre es ordenadors: la suya historia, como son per dentro… Y per supuesto, hen conoxiu es esperimentos d’este par de cingals.
