Os famosos d’A Espuña se’n van a fer una cursa ta un castiello en a Pena Montañesa.
Con esta entrada, el blog arriba a las 250 entradas, cerca de veinte mil vesitas y cuasi siete años en internet. No ye mal ta un blog escolar adedicau a una luenga tan chicota como l’aragonés. 🙂
26 de setiembre, diya europeo de las luengas
Este 26 de setiembre se celebra el Diya Europeo de las Luengas, y ta celebrarlo, estrenarén un nuevo curto. Esta vez será “Famosos en o castiello d’a Pena Montañesa” de la escuela d’A Espuña. ¡Atentos a las vuestras pantallas!
La era d'es dinosaurios
Ya han empecipiau las clases en el CRA Cinca-Cinqueta. En Saravillo de momento son sin escuela, que encara ye en obras. Ta que se les faya més curta la’spera basta que i tornen ta’l puesto, von a publicar un d’es curtos que teneben pendiéns, “La era d’es dinosaurios”. ¡Estes borches de Saravillo son tremendos!
Tornando a's orichens
En setiembre de 2008 voi comencipiar la mía carrera de mayestro d’aragonés en el CEIP Asunción Pañart de L’Aínsa. Siete años dimpués, torno ta’l mesmo puesto con clases d’aragonés. “A clica” a la fin torna. 😉
La clica, en las fiestas de Chistén
La clica contina de fiestas, ara per Chistén. Este mierqueles diya 19 ye la vrispa, y se fará proyeción d’es zaguers curtos fetos per es borches del CRA Cinca-Cinqueta. A las 19:30 tos asperán en el salón de la casa del lugar.
Estrenos de la clica en las fiestas de Saravillo
Maitín ye la vrispa de las Fiestas de Saravillo, y ta celebrarlo, se fará una proyeción ta to’l lugar del Curto “Descubriendo a Mosén Bruno“. Amés, tendrén a la fin l’estreno d’es dos curtos que teneben pendiéns de la escuela de Saravillo: “La era d’es dinosaurios” y “La princesa lladre”. ¡Buena manera de empecipiar las fiestas!
Cine en aragonés será en el "XXIV Congreso de Luengas e Culturas Europeyas Menazatas"
El nuestro proyeto “Cine en aragonés” formará parte del “XXIV Congreso de Luengas e Culturas Europeyas Menazatas” que se celebra en Huesca es diyas 23, 24 y 25 de chuliol. La tarde del viernes faré una esposición sobre es curtos fetos estes años pasaus en las clases d’aragonés del CRA Cinca-Cinqueta. Nos viyén en el salón d’atos de la Diputación Provincial de Huesca, en es porches de Galicia.
SuperNerea, Supersecallo y Granizoman
Ye el diya de la falleta en San Chuan, asinas que ta celebrarlo, estrenán un curto d’es borches de la escuela: SuperNerea, Supersecallo y Granizoman. ¡Que tos faya goi!
Las plantas
El curso ya ye rematau ta’s borches. Con el proyeto de las plantas hen montau una esposición de plantas de la ribera del Ara. L’atro diya von fer una cursa per un camín y von conoixer las plantas que creixen al canto del río. Con las fuellas que von replegar, hen aprestau unas fichas con es nombres científico, en castellán, aragonés e inglés, asinas como cosas que heben aprendiu: si yeran caducas, perennes, el fruto que dan, ta que s’emplegan…
¿Cómo ha quedau? ¿Tos fa goi?
Dos esperiencias en l'Heraldo Escolar
Allega la fin del curso, y l’Heraldo escolar se despide basta setiembre. Ha feto un numero especial trigando las esperiencias educativas més destacadas d’este curso seguntes els. Tiengo la suerte de que amanixcan dos mías, una del CRA Cinca-Cinqueta en aragonés, y atra del CRA Alto Ara. Esta zaguera, incluso en portada. ¡Mersi y norabuena a’s borches, que son es protagonistas d’estes troballos con el suyo aprender! ¿Qui diz que en la escuela rural no pueden ferse cosas majas? 😉
