Cuentan que fa tiempos i heba una casa mui rica. Teneban abundantes caballerías en las suyas bordas, pero toz es años, la nuet de la misa de gallo, se les moriba la milló mula. Fartos d’aquel esconchuro e sin saber que fer , un criato se quedó amagato dezaga de un truxato a viyer si podeba saber que pasaba ixa nuet.
Al rato amanixió un gato negro, que aspaciet, s’arrimó ta una mula e se’n puyó ta la suya lomera. El criato sintió que el mixín deciba:
– Ya’l siento pobreta, pero no tiengo més remedio que matarte…
Alavez, d’un blinco, l’hombre salió del amagadero. Prenió un tocho e le soltó un cinglazo al gato en la pata. La mula se salvó, encara que l’altro animalot podió escapar.
A l’atro’l diya, cuan marchó ta la cocina a almorzar , sintió que deciban que la güela de casa no s’heba puisto devantar , que marchaba coixa con una nafra que pa qué en la canilla. Al criato se le cheló la sangre. La viella de casa yera una bruixa…
